Cando alguén busca «perruquería en Boiro» ou «fontaneiro preto de min», o primeiro que ve non é unha lista de webs, senón un mapa con tres negocios. Estar nese mapa é, para moitos negocios locais, máis importante que calquera outra cousa en internet. E o mellor é que é de balde.
Que é Google Business Profile
É a ficha gratuíta do teu negocio en Google (antes chamábase Google My Business). É o que aparece en Google Maps e á dereita dos resultados cando alguén busca o teu nome: enderezo, horario, teléfono, fotos, recensións e unha ligazón á túa web.
Paso 1: crea a ficha
- Entra en Google Business Profile coa conta de Google que vaias usar para o negocio. Mellor unha conta do negocio que a túa conta persoal.
- Escribe o nome do teu negocio tal e como o usas na vida real, sen engadir palabras clave nin cidades. Engadir «deseño web Rianxo» ao nome vai contra as normas de Google e pode facer que suspendan a ficha.
- Escolle a categoría principal con coidado: é un dos factores que máis inflúen. Busca a máis específica posible («Perruquería» mellor que «Salón de beleza» se só cortas o pelo).
Paso 2: tes local ou vas á casa do cliente?
É a decisión que máis dúbidas xera:
- Se os clientes van ao teu local (tenda, bar, clínica), indica o enderezo e aparecerá no mapa.
- Se ti vas á casa do cliente ou traballas a distancia (fontaneiro, electricista, limpeza, deseño web desde casa), configura a ficha como empresa de zona de servizo: o enderezo queda oculto e escolles as zonas nas que traballas, por exemplo «Rianxo», «Boiro» ou «Comarca do Barbanza».
Se traballas desde casa e pos o teu enderezo coma se fose un local aberto ao público, é moi probable que Google rexeite a verificación.
Paso 3: verifica a ficha
Google ten que comprobar que o negocio existe. Segundo o caso, pedirache unha chamada ou SMS, un correo, unha carta postal cun código ou, cada vez máis a miúdo, un vídeo.
Se che pide vídeo, grávao dunha soa vez, sen cortes, e que se vexa:
- Onde estás: a rúa, o número ou algún cartel que identifique a zona.
- O teu negocio: o letreiro, o logotipo ou o lugar de traballo.
- Que es quen o xestiona: ferramentas de traballo, tarxetas de visita, abrir a porta coas túas chaves ou o programa que usas no ordenador.
Nós tamén tivemos que gravalo, e o consello máis útil é este: se non tes un local con letreiro, ten á man algo co teu logotipo (unhas tarxetas ou un cartel impreso) e ensina ben a rúa ao comezo do vídeo.
Paso 4: completa a ficha ao 100 %
Unha ficha completa aparece máis e converte mellor:
- Horario real, incluídos os festivos.
- Teléfono e web. Liga á páxina da túa web máis relevante, non sempre á portada.
- Servizos con descrición e, se podes, con prezo.
- Descrición do negocio: que fas, para quen e onde, escrita para persoas.
- Fotos: fachada ou lugar de traballo, equipo, traballos feitos. Fotos reais, non de bancos de imaxes.
Paso 5: nome, enderezo e teléfono iguais en todas partes
Google compara os datos da túa ficha cos da túa web, as túas redes e directorios como Páginas Amarillas. Se nun sitio pos «R/ Maior 3» e noutro «Rúa Maior, nº 3, baixo», ou un teléfono antigo, Google fíase menos. Revisa que o nome, o enderezo e o teléfono sexan idénticos en todas partes.
Paso 6: consegue recensións (e respóndeas)
As recensións son un dos factores que máis pesan no mapa, e ademais son o primeiro que mira un cliente.
- Pídeas ao rematar un traballo, cando o cliente está contento. Desde a ficha podes copiar unha ligazón directa para deixar recensión e envíala por WhatsApp.
- Responde a todas, tamén ás negativas, con educación e sen discutir.
- Non merques recensións nin as escribas ti: Google detéctaas e pode penalizar a ficha.
Paso 7: conecta a ficha cunha boa web
A ficha e a web refórzanse entre si. Unha web rápida, que diga claramente que fas e onde, cos mesmos datos de contacto que a ficha, axuda a que Google entenda que es un negocio real desa zona. Se aínda non tes web, contámosche canto custa unha páxina web.
Erros habituais
- Meter palabras clave ou cidades no nome do negocio.
- Poñer o enderezo da casa coma se fose un local aberto ao público.
- Escoller unha categoría demasiado xeral.
- Deixar a ficha a medias, sen fotos nin horario.
- Ter datos distintos na web, na ficha e nas redes.
- Non responder nunca ás recensións.
Axudámosche?
En PDCG, en Rianxo, facemos páxinas web pensadas para aparecer en Google e axudámosche a configurar a túa ficha como parte da nosa consultoría. Se tes un negocio no Barbanza, mira tamén a nosa páxina de deseño web en Rianxo ou escríbenos.
Preguntas frecuentes
Custa diñeiro aparecer en Google Maps?
Non. A ficha de Google Business Profile é gratuíta. Só pagas se decides facer anuncios.
Canto tarda en aparecer o meu negocio?
Unha vez verificada, a ficha adoita comezar a amosarse en poucos días. Subir posicións no mapa leva máis tempo e depende da competencia, das recensións e da información da ficha.
Podo ter ficha se traballo desde casa?
Si, como empresa de zona de servizo. O teu enderezo queda oculto e apareces nas zonas que escollas.
Por que non aparezo aínda que teña a ficha?
As causas máis habituais son que a ficha non está verificada, que a categoría non encaixa co que busca a xente, que tes poucas recensións ou que a competencia está máis preto do lugar desde onde se busca.